ក្រុមអ្នកគាំទ្រ មកទស្សនាផ្ទាល់នៅស្តាតអូឡាំពិក
វាគឺជារឿងនឹកស្មានមិនដល់ដែលក្រុមជម្រើសជាតិឈុតធំកម្ពុជា ត្រូវក្រុមប្រទេសសិង្ហបុរីលត់យ៉ាងចាស់ដៃរហូតដល់៤-០ នៅលើទឹកដីខ្លួនឯង ក្នុងវគ្គជម្រុះជុំទី២ សម្រាប់ការប្រកួតឆ្ពោះទៅកាន់ព្រឹត្តិការណ៍World Cup រុស្ស៊ី កាលពីយប់ថ្ងៃព្រហស្បតិ៍ទី១១ ខែមិថុនា ។ លទ្ធផលនេះធ្វើឲ្យអ្នកគាំទ្រដែលត្រូវគេប៉ាន់ប្រមាណថាមិនតិចជាង៦ម៉ឺននាក់ដែលសម្រុកទៅទស្សនាផ្ទាល់នៅស្តាតអូឡាំពិកខកចិត្ត។
ការប្រកួតនេះត្រូវគេមើលឃើញថាមានមនុស្សកកកុញ ដែលអាចចាត់ទុកថាជាប្រវត្តិសាស្រ្តលើកដំបូងរបស់កម្ពុជា ដែលមានអ្នកគាំទ្រច្រើនហួសពីការស្មាន នៅក្នុងព្រឹត្តិការណ៍កីឡានាប៉ុន្មានឆ្នាំចុងក្រោយនេះ។ កន្លែងសម្រាប់ភ្ញៀវទស្សនាចំនួន៥៥០០០កៅអី ត្រូវគេឃើញអង្គុយពេញ ខណៈដែលអ្នកឈរគ្មានកន្លែងអង្គុយ ក៏មានសភាពច្រូងច្រាងរាប់ពាន់នាក់ និងហៀរហូរពេញបរិវេណស្ដាតអូឡាំពិកតែម្ដង។ មិនមានតួលេខពិតប្រាកដពីចំនួនមនុស្សដែលទៅបង្ហាញខ្លួននៅក្នុងព្រឹត្តិការណ៍នាយប់នោះទេ ដោយគ្រាន់តែមានការប៉ាន់ស្មានថាហោចណាស់ក៏ជាង៦ម៉ឺននាក់ ដោយសារតែបរិវេណទីលានដែលផ្ទុកមនុស្សបាន៥៥០០០នាក់ ត្រូវអស់កៅអី។
យោងតាមការបញ្ជាក់ក្រៅផ្លូវការពីអ្នករៀបចំ មនុស្សដែលទៅទស្សនាការប្រកួតរវាងក្រុមកម្ពុជា និងក្រុមសិង្ហបុរី គឺ១០ម៉ឺននាក់ឯណោះ ដោយសារតែនៅខាងក្រៅលានប្រកួតដែលអាចមើលឃើញតារាងបាល់ ស្ថិត ក្នុងបរិវេណស្ដាតអូឡាំពិកសុទ្ធតែកកកុញដោយមនុស្សម្នា ដែលមិនត្រូវបានអនុញ្ញាតឲ្យចូលទៅកាន់កន្លែងឈរទស្សនា។ ទោះតួលេខដែលបានប៉ាន់ស្មាន ស្ថិតនៅក្នុងភាពខុសគ្នា ក៏ចំនួនមនុស្សដែលបានប្រមូលផ្ដុំនោះ ត្រូវគេចាត់ទុកថាជាចំនួនច្រើនបំផុតសម្រាប់ព្រឹត្តិការណ៍កីឡាដែលបានកើតមាននៅក្នុងប្រទេសកម្ពុជានារយៈពេលចុងក្រោយ។ ក្រុមអ្នកទស្សនាទាំងនោះ មិនត្រឹមតែបានចំណាយប្រាក់ និងចំណាយពេលមកគាំទ្រដល់ទីតាំងប្រកួតប៉ុណ្ណោះទេ ភាគច្រើននៃពួកគេក៏ធ្វើសកម្មភាព លើកទឹកចិត្តដល់ក្រុមកីឡាករកម្ពុជាប្រកបដោយភាពរស់រវើកផងដែរ។ មិនអន់ជាងក្រុមអ្នកគាំទ្របាល់ទាត់របស់បណ្ដាប្រទេសរីកចម្រើន យុវវ័យកម្ពុជាក៏បានគូសរូបទង់ជាតិនៅលើផ្ទៃមុខ និង បិទ ឬឆ្លាក់រូបទង់ជាតិនៅលើថ្ពាល់ ធ្វើឲ្យគេមើលឃើញពីទំហំគាំទ្រចំពោះវិស័យបាល់ទាត់ជាតិថាមានកម្រិតរីកចម្រើនគួរឲ្យសរសើរ។ ក្រុមខ្លះបានទាំងចំណាយថវិកាផ្ទាល់ខ្លួន ទិញឯកសណ្ឋានដូចក្រុមបាល់ទាត់កម្ពុជា និងលើកត្រដាងទង់ជាតិ អមដោយការបន្ទរសំឡេងហ៊ោកញ្ជ្រៀវ តាំងពីការប្រកួតមិនទាន់ចាប់ផ្ដើម។ អ្នកគាំទ្រខ្លះបានស្ពាយឧបករណ៍ឧគ្ឃោសនាសព្ទជាប់ខ្នង ដើម្បីបន្លឺសំឡេងគាំទ្រឲ្យសាយភាយបានកាន់តែឆ្ងាយ។ សូម្បីសំឡេងទះដៃ ក៏ត្រូវគេឮបន្លឺជាចង្វាក់ភ្លេង រំលេចដោយការច្រៀងរាំយ៉ាងកងរំពង។
ក្នុងពេលការប្រកួតហៀបចាប់ផ្ដើម អ្នកមានទូរសព្ទស៊េរីទំនើបគ្រប់ដៃ បានរំលេចភ្លើងពិលធ្វើឲ្យសាលកីឡាករទាំងមូល អណ្ដែងដោយពន្លឺភ្លើងពិល មានសភាពមិនខុសពីកម្រងផ្កាយ លម្អទីលានប្រកួត។ ក្រុមអ្នកគាំទ្រទាំងនេះ មិនមានសភាពនឿយហត់នោះទេ បើទោះជាពួកគេម្នាក់ខ្លះលើកក្រវីទង់ជាតិ ខ្លះច្រៀងរាំ ខ្លះលោតកញ្ជ្រោល និងភាគច្រើនគឺស្រែកបន្ទរ ដើម្បីចង់ឲ្យកីឡាករកម្ពុជា បានឮ និងមានកម្លាំងចិត្តសម្រាប់ការប្រកួតក្ដី។ ប៉ុន្តែសន្ទុះដែលបានលេចឡើង ត្រូវគេឃើញប្រែប្រួលបន្តិចម្ដងៗ បន្ទាប់ពីក្រុមបាល់ទាត់សិង្ហបុរី ដែលជាភ្ញៀវដំបូងគេសម្រាប់វគ្គជម្រុះWorld Cup នេះ ស៊ុតចូលទីកម្ពុជាមួយគ្រាប់ហើយមួយគ្រាប់ទៀត រហូតដល់៣គ្រាប់ ក្នុងតង់ទី១។ នៅក្នុងម៉ោងសម្រាក ក្រុមអ្នកគាំទ្រភាគច្រើន នៅតែបន្តច្រៀងរាំ និងបន្លឺឧគ្ឃោសនាសព្ទ ព្រមជាមួយក្ដីសង្ឃឹមថាក្រុមកម្ពុជានឹងមានលទ្ធភាពតាមយកគ្រាប់បាល់មកវិញនៅតង់ទី២។
កញ្ញា ពេជ្រ សោភា ដែលជាតារាចម្រៀងប្រចាំហង្សមាស ត្រូវគេឃើញចុះទៅដល់តារាងធំ ដើម្បីលេងបាល់ និងបានប្រកាសដាក់ក្បាលមេក្រូ សូមឲ្យក្រុមកម្ពុជាមានសំណាងសម្រាប់ការប្រកួតនោះផង។ សំឡេងគាំទ្រត្រូវគេឮបន្ទរជាបន្តបន្ទាប់ ដើម្បីបង្កើនសន្ទុះឲ្យកីឡាករកម្ពុជាសម្រាប់ការប្រកួតនៅ៤៥នាទីវគ្គបន្ទាប់។ យ៉ាងណាក៏ដោយ ក្រុមបាល់ទាត់កម្ពុជា នៅតែធ្វើឲ្យអ្នកគាំទ្រខកបំណង ជាមួយទម្រង់លេងមិនសូវល្អ។
លទ្ធផល៤-០ ដែលក្រុមសិង្ហបុរីស៊ីក្រុមកម្ពុជា គឺជាអ្វីដែលក្រុមម្ចាស់ផ្ទះ និងអ្នកគាំទ្រទទួលភាពជូរចត់។ អ្នកទស្សនាភាគច្រើនបានរិះគន់ពីទម្រង់លេងរបស់កម្ពុជា សម្រាប់ការប្រកួតជើងទី១នោះ ដោយសូម្បីតែការគ្រប់គ្រងបាល់ក៏មិនសូវល្អ រីឯការបោះបាល់ឲ្យគ្នា ក៏មានចំណុចមិនស៊ីសង្វាក់គ្នា។ ធៀបនឹងកាលលេងមិត្តភាពជាមួយឡាវ និងមីយ៉ាន់ម៉ា ទម្រង់លេងរបស់កម្ពុជាលើកនេះ គឺផ្ទុយស្រឡះដាច់ឆ្ងាយ។
លោក Kazunori Ohara គ្រូបង្វឹកបាល់ទាត់ជាជនជាតិជប៉ុនរបស់កម្ពុជាបានសម្ដែងឲ្យឃើញនូវការខកចិត្តដូចគ្នា នៅពេលប្រកួតចប់ តាមរយៈការស្ដីបន្ទោសទៅលើកីឡាកររបស់ខ្លួន ថាលេងមិនល្អ និងដូចមិនមានអារម្មណ៍ក្នុងពេលប្រកួតនោះ។
នៅថ្ងៃទី១៦ ខែមិថុនា ខាងមុខនេះ កម្ពុជានឹងឡើងទៅលេងជើងទី២ នៅប្រទេសសិង្ហបុរីវិញ។ វគ្គជម្រុះបន្តបន្ទាប់ គឺប៉ះជាមួយប្រទេសអាហ្គានីស្ថាន ស៊ីរី និងប្រទេសជប៉ុន ដោយមួយជើងប្រកួតក្នុងស្រុក និងមួយជើងនៅក្រៅទឹកដីបែបនេះដូចគ្នា។ លទ្ធផល៤-០ ចាញ់ក្រុមសិង្ហបុរី ធ្វើឲ្យឱកាសជម្រុះពូលរបស់កម្ពុជា មានមិនច្រើននោះទេ ដោយសារតែក្រុម៣ទៀត សុទ្ធតែមានកម្រិតបាល់ទាត់ល្អជាងសិង្ហបុរី៕
